Malampuson nga gipahigayon sa Tampilisan Municipal Fire Station ang usa ka BFP Operation and Administration Lecture alang sa mga Criminology Interns – Batch Lakas-Lahi 2025-2026 sa School of Criminal Justice Education, JRMSU-TC, didto sa Barangay ZNAC, Tampilisan, Zamboanga del Norte, kaniadtong Setyembre 8, 2025.
Ang maong kalihukan gipangulohan ni SFO3 Roseller P. Taleon, Acting Municipal Fire Marshal sa Tampilisan, uban ang suporta sa iyang mga kauban sa buhatan. Tumong sa maong lektyur mao ang paghatag og dugang kahibalo ug pagsabot sa mga interns kalabot sa operasyon ug administrasyon sa Bureau of Fire Protection (BFP).
Lakip kini sa ilang Criminology Internship Candidate Course (CICC), nga nagtinguha sa pagpalambo sa kasinatian ug praktikal nga abilidad sa mga estudyante isip mga umaabot nga alagad sa balaod. Pinaagi niini, mas mapalig-on ang ilang pagsabot sa hinungdanong papel ug responsibilidad sa BFP, dili lamang sa pagpanalipod batok sa sunog, apan apil usab sa pag-atubang sa lain-laing emerhensiya ug sa pagpanalipod sa kaluwasan sa publiko.
Ang aktibidad nakatabang sa pagpalig-on sa koordinasyon ug pakig-uban tali sa BFP ug sa akademya, ilabi na sa pag-andam sa bag-ong henerasyon sa mga opisyal sa kapulisan ug emergency responders.
Sa iyang mensahe, gipasiugda ni SFO3 Taleon ang importansya sa husto nga pagbansay ug pag-angkon sa praktikal nga kasinatian aron mahimong epektibo ug responsableng mga public servants sa umaabot.(Jumalisa Papa)
Source: BFP R9 Tampilisan MFS