Aktibong mitabang ang mga personahe sa Coast Guard Station Zamboanga del Norte (CGS ZDN) ug Coast Guard Sub-Station Operations Unit (CGSOU) sa panagdiskarga ug panag-apod-apod og bugas alang sa mga benepisyaryong pamilya sa Dapitan City, isip kabahin sa selebrasyon sa Pasko sa lokal nga kagamhanan.
Gipahigayon ang kalihokan kaniadtong Disyembre 20 sa Barangay San Francisco ug Disyembre 21 sa Barangay Sulangon, nga gipangulohan sa Local Government Unit sa Dapitan City ubos sa inisyatiba ni Konsehal Alex Pajaro Meily. Tumong sa programa ang paghatag og tabang ug pagpalig-on sa diwa sa pagtinabangay sa mga komunidad ilabi na karong holiday season.
Sumala sa LGU, ang apod-apod og bugas usa ka paagi sa pag-abot sa mga pamilyang nanginahanglan ug pagpakita sa pag-amuma sa katawhan sa panahon sa Pasko.
Ang maong kalihokan nagpakita sa padayon nga panaghiusa sa Philippine Coast Guard ug sa lokal nga pangulohan sa Dapitan City sa pagpalambo sa kaayohan sa katawhan ug sa paghatag og serbisyo nga adunay kasingkasing alang sa komunidad.(IKEN B. GULLEM)
Source: Coast Guard Station Zamboanga del Norte