DIPOLOG CITY — Daghang pamilya ang naapektuhan human masunog ang pipila ka mga balay sa Sitio Wak-Wak, Purok Bulahan, Barangay Turno alas 6:00 sa buntag niadtong Hunyo 14, 2026.
Matod sa mga residente, nakamata sila tungod sa mga shagit ug kalit nga kasamok sa lugar samtang paspas nga mikuyanap ang kalayo sa mga nagdikit nga kabalayan. Tungod niini, nagdali ang mga lumolopyo sa pagluwas sa ilang pamilya ug sa mga gamit nga mahimo pa nilang madala.
Usa sa mga naapektuhan mao si Regiven Tabinas nga bag-o pa lamang nakapauli gikan sa trabaho sa dihang nahitabo ang sunog. Iyang giuna ang kaluwasan sa iyang pamilya ug nakahigayon pa nga makuha ang pipila nilang mga gamit sa wala pa modako pag-ayo ang kalayo.
Gikataho nga daghang balay ang nalamoy sa sunog tungod sa paspas nga pagkuyanap niini. Bisan pa sa kalisod sa pagsulod sa lugar, naningkamot ang mga bombero aron mapugngan ang dugang kadaot ug mapalong ang kalayo.
Karun, nanawagan ang mga biktima sa mga adunay maluloy-ong kasingkasing alang sa bisan unsang matang sa tabang aron makatabang kanila sa pagsugod pag-usab human sa maong trahedya.(JENIFFER JR. DELICA)
Photo: Zanorte News Flash