DAPITAN CITY — Gidapit sa City Government of Dapitan ang mga mangingisda ug fishing enthusiasts sa pag-apil sa Kinabayo Festival 2026 Jigging Tournament o “Yug Yug Selinog,” usa ka open fishing competition nga ipahigayon sa Selinog Island karong Hulyo 11, 2026.
Ang maong torneyo nagtumong sa pagpasundayag sa kahanas, estratehiya ug determinasyon sa mga partisipante sa pagpangisda, samtang gisaulog usab ang adunahang maritime heritage ug madasigon nga kultura sa Kinabayo Festival.
Magkigsangka ang mga kalahok sa pagpangdakop sa dagkong isda sa kadagatan sa Selinog aron makuha ang titulo ug dagkong premyo nga gipahimutang sa torneyo. Nagpaabot og ₱25,000 ang kampeon, samtang ₱20,000, ₱15,000, ₱12,500 ug ₱10,000 ang madawat sa mosunod nga mga modaog.
Gilauman sa mga organisador nga makadani kini og daghang mangingisda ug bisita gikan sa nagkalain-laing lugar, nga makapalig-on usab sa turismo ug lokal nga ekonomiya sa dakbayan.
Padayon nga gipakita sa Kinabayo Festival ang pagpasidungog sa kultura, panginabuhian ug mga tradisyon sa Dapitan pinaagi sa mga kalihokang naghiusa sa komunidad ug naghatag og bag-ong oportunidad sa katawhan.(JENIFFER JR. DELICA)
Source: Dapitan City Government