Gisusi sa Bureau of Fire Protection Dipolog City Fire Station ang mga nightclub, pub house, bar ug uban pang kaparehong establisemento sa Dakbayan sa Dipolog niadtong Hulyo 15 aron masiguro ang ilang pagsunod sa mga lagda sa kaluwasan batok sa sunog.
Gipahigayon ang inspeksyon subay sa memorandum nga gipagawas sa mas taas nga hedkuwarter sa Bureau of Fire Protection, diin gisusi ang mga fire protection system, agianan sa emerhensiya, kahandam sa mga establisemento ug kaluwasan sa mga kostumer ug empleyado.
Kabahin usab sa inspeksyon ang pagsiguro nga nasunod sa mga establisemento ang mga probisyon sa Fire Code of the Philippines ug sa Revised Implementing Rules and Regulations niini aron malikayan ang posibleng mga insidente sa sunog.
Padayon nga gipalig-on sa Bureau of Fire Protection Dipolog City Fire Station ang ilang kampanya sa fire prevention pinaagi sa regular nga inspeksyon ug hugot nga pagpatuman sa mga lagda alang sa kaluwasan sa publiko.(JENIFFER JR. DELICA)
Source: BFP R9 Dipolog City Fire Station