Nagpadala ang Department of Environment and Natural Resources Zamboanga Peninsula og 7,518.75 board feet nga lumber ug ayudang pinansyal alang sa mga pamilyang naapektuhan sa magnitude 7.8 nga linog sa Lalawigan sa Sarangani.
Gikan ang mga lumber sa mga nakumpiskang forest products sa Community Environment and Natural Resources Offices sa Manukan, Piñan, Liloy, Ramon Magsaysay ug Guipos, lakip usab ang mga kahoy nga nakuha pinaagi sa special tree cutting permits ug mga materyales nga giturn-over gikan sa mga proyekto sa Department of Public Works and Highways. Gitugyan ang bahin sa maong donasyon ngadto sa mga lokal nga panggamhanan sa Glan ug Malapatan alang sa pag-apod-apod sa mga benepisyaryo.
Gisuportahan sa TVI Resource Development Philippines Incorporated ang pagbiyahe sa mga lumber padulong sa Sarangani, samtang gisugdan na sa 512th Engineer Construction Battalion, 504th Combat Engineer Battalion ug Citizens Armed Force Geographical Unit ubos sa 73rd Infantry Battalion ang pagtukod og mga core shelter alang sa mga nabalhin nga residente sa Glan.
Padayon nga nanawagan ang DENR Zamboanga Peninsula sa publiko, pribadong sektor ug mga organisasyon nga motampo og dugang nga lumber ug uban pang construction materials aron mapadali ang pagbangon sa mga komunidad nga naapektuhan sa linog sa Sarangani.(JENIFFER JR. DELICA)
Source: DENR Zamboanga Peninsula