Naghiusa ug nagtigom ang mga mayor sa Zamboanga del Norte atol sa 2nd Quarter Meeting sa League of Municipalities of the Philippines (LMP) aron hisgutan ang mga prayoridad nga programa, seguridad ug kalamboan sa matag lungsod sa probinsya.
Gipangunahan ni LMP Zamboanga del Norte Chapter President ug Labason Mayor Jelster Ed T. Quimbo ang maong tigum uban sa mga municipal mayor ug mga opisyal sa probinsyal nga pangagamhanan ubos sa liderato ni Governor Darel Dexter T. Uy.
Atol sa meeting, gibug-os sa mga mayor ang ilang suporta sa mga programa nga nagtutok sa imprastraktura, serbisyong pangkatawhan ug mas epektibong pagdumala sa lokal nga pangagamhanan alang sa tuig 2027.
Lakip usab sa gihisgutan ang proposed resolution alang sa pagtukod og Coast Guard substations sa tanang coastal municipalities aron mapalig-on ang seguridad sa mga baybaying dapit sa probinsya.
Nagpresentar usab ang Department of Education (DepEd) sa mga updates kabahin sa kahimtang sa edukasyon ug mga programa sa lalawigan. Gituki usab sa mga lokal nga lider ang preparasyon alang sa umaabot nga “Saulog sa Bag-ong Zamboanga del Norte 2026.”
Sumala sa mga opisyal, ang maong quarterly meeting nagpakita sa padayon nga panaghiusa sa mga mayor aron mapalig-on ang serbisyo publiko ug kalamboan sa probinsya.(IKEN B. GULLEM)
Source: Zamboanga del Norte Provincial News Network