Dako og tabang sa pagpalambo sa panginabuhian sa mga mag-uuma sa Barangay El Paraiso, Liloy ang Farm Business School (FBS) nga gipahigayon sa Department of Agrarian Reform (DAR) Zamboanga del Norte alang sa mga miyembro sa El Paraiso Farmers Agrarian Reform Cooperative.
Gidumala sa Program Beneficiaries Development Division (PBDD) ubos sa pagpanguna ni Provincial Agrarian Reform Program Officer II Daisy Dell Suan Digamon, ang pagbansay nagtutok sa paghulma sa mga Agrarian Reform Beneficiaries (ARBs) nga dili lamang mag-uuma kondili mga negosyante usab sa agrikultura.
Atol sa mga sesyon, gitudloan ang mga partisipante sa husto nga pagplano sa umahan, pagdumala sa mga agribusiness venture, ug mga pamaagi aron mapadayon ang produktibo ug mapuslanong produksiyon.
Aron mas mapalig-on ang ilang operasyon sa umahan, gihatagan usab ang mga ARBs og mga kinahanglanong kagamitan ug farm inputs lakip ang abono, plastik nga drum, sprinkler, sundang, ug hose.
Sumala sa DAR, ang maong inisyatiba kabahin sa ilang paningkamot nga mapataas ang produksyon ug kita sa mga benepisyaryo pinaagi sa paghiusa sa kahibalo ug praktikal nga suporta alang sa mas lig-on ug mas kompetitibong sektor sa agrikultura.(IKEN B. GULLEM)
Source: DAR Zamboanga del Norte Province