Gipaabot nga mahimong bag-ong timaan sa turismo ug kalamboan sa Dipolog City ang giplanong Dipolog Boardwalk nga ipatukod sa baybayon sa siyudad ubos sa inisyatiba sa Provincial Government of Zamboanga del Norte.
Usa kini sa mga prayoridad nga proyekto ni Gobernador Darel Dexter Uy nga nagtumong sa pagdugang sa atraksyon sa bantugang Dipolog Boulevard ug paghimo og bag-ong lugar alang sa pagpahayahay ug mga kalihokan sa komunidad.
Base sa plano, ang boardwalk motunol ngadto sa dagat diin makahatag kini og halapad nga talan-awon sa baybayon ug mahimong dugang nga destinasyon alang sa mga turista ug bisita sa lalawigan.
Gawas sa papel niini isip pasyalanan, gilauman usab nga makatabang ang proyekto sa pagpanalipod sa baybayon batok sa kusog nga balod ug dili maayong kahimtang sa dagat ilabina panahon sa habagat. Gitan-aw kini nga adunay benepisyo dili lamang sa turismo kondili usab sa kalikupan ug kaluwasan sa komunidad.
Nagkantidad og gibanabana nga P200 milyon ang proyekto nga pondohan pinaagi sa Tourism Infrastructure and Enterprise Zone Authority (TIEZA) ubos sa pagpangulo ni Chief Operating Officer Mark Lapid. Sumala sa mga opisyal sa probinsya, sugdan ang konstruksyon sa higayon nga makompleto ang tanang dokumentaryo ug regulasyon nga mga kinahanglanon.
Nagpasalamat si Gobernador Uy sa suporta sa Department of Tourism ug TIEZA sa maong proyekto nga matud pa magpalig-on sa imprastraktura sa turismo ug magdasig sa malungtarong kalamboan sa lalawigan.
Dugang kusog sa proyekto ang pagbisita ni Lapid sa Dipolog City niadtong Abril 23 alang sa ocular inspection sa giplanong lugar. Gitugotan niini ang mga opisyal sa turismo sa nasudnong lebel nga masusi ang potensyal nga epekto sa proyekto sa turismo ug coastal development sa siyudad.
Sa higayon nga mahuman, gilauman nga mahimong usa sa mga nangunang atraksyon sa Dipolog City ang boardwalk ug magsilbing bag-ong lugar alang sa pagpahayahay, panagtapok sa komunidad, ug dugang proteksyon sa baybayon.(IKEN B. GULLEM)
Source: Zamboanga del Norte Provincial News Network