Si Barangay Captain Pedro Lihaylihay, nagkanayon nga adunay 30 ka mga membro sa Balakan Kapit-Bisig Farmers Association kinsa nagtanum sa 3,000 ka mga punuan sa ampalaya nga mahimo na nila kining maani karong bulana.
Nagpasalamat si Kapitan Lihaylihay ngadto ni Mayor William Maribojoc sa lungsod sa Salug tungod kay napili ang ilang barangay aron matabangan ang mga mag-uuma alang sa ilang kapanginabuhian.
Ingon man, gikan sa pagtanum sa semilya hangtud karon, walay puas ang pagtabang kanila sa kagamhanang probinsyal pinaagi ni Provincial Agriculturist Ms. Maybel Bustalino sa pagpanghatag ug mga panginahanglanon sa mga mag-uuma.
Nadawat nila gikan sa Office of the Provincial Agriculturist mao ang libreng daro, mga abono ug mga liso sa utanon ug napulo ka crates nga sudlanan sa ilang mga talong panahon na unya kung sila maka-harvest.
Gihatagan usab sila ug set sa makina sa tubig aron masayon ang pagpamisbis sa ilang mga tanum. Aduna usay baril nga punduhanan nila og tubig, ug mga water hose.
Samtang ang organisasyon sa Dinuan Vegetable Growers Association (DVEGA) adunay 28 ka membro sa mag-uuma kinsa mitanum sa 6,000 ka punuan sa talong.
Si Konsehal Joel Ubod sa maong barangay namahayag nga dako kaayo kini’g ikatabang sa ilang assosasyon maoy hinungdan nga naghugpong sila ug nagkahiusa aron aduna silay ma-income. Nagpasalamat usab sila ni Barangay Captain Renato Arnais nga usa usab sa nagsuporta nilang mga mag-uuma.
(Source: Provincial Information Center – Zanorte)