Nagpakitang-gilas ang mga delegasyon gikan sa nagkalain-laing lungsod ug siyudad sa Zamboanga del Norte atol sa Saulog Parade ug Street Dancing Competition nga gipahigayon karong Hunyo 1 sa Dakbayan sa Dipolog.
Gipuno sa madasigon nga mga mananayaw ang mga kadalanan gikan sa Zamboanga del Norte Sports Complex padulong sa Dipolog Boulevard, diin ilang gipakita ang makabibihag nga mga pasundayag nga puno sa kolor, ritmo ug kultura.
Miapil sa kompetisyon ang mga delegasyon gikan sa Sindangan, Dapitan City, Sergio Osmeña Sr., Roxas, Polanco, Siocon, Leon B. Postigo, Siayan, Salug ug uban pang lokal nga panggobyerno nga nagdala sa ilang talagsaong tradisyon ug kabilin.
Gilauman nga mas mopasiga pa sa selebrasyon sa Saulog 2026 ang ilang mga pasundayag karong gabii samtang padayon nga gisaulog sa lalawigan ang iyang adunahang kultura ug identidad.(JENIFFER JR. DELICA)
Source: PIA Zamboanga del Norte