DAVAO CITY — Nasakmit sa mga otoridad ang usa ka 44-anyos nga lalaki, manager sa usa ka pribadong kompanya nga giila sa alyas “Allan,” human kini masakpan sa giingong pagsulay sa pagpalusot og illegal nga droga sa checkpoint sa Calinan, ning siyudad.
Sakay sa usa ka puti nga sakyanan ang suspek dihang naharang kini sa fixed checkpoint sa TF-Davao ug Calinan Police Station 10 sa Purok 2, Barangay Lacson, Davao City niadtong alas 9:00 sa buntag, Lunes, Hunyo 1, 2026.
Sumala sa report sa Calinan Police Station 10, nadiskobrehan sa inspection nga gisulod sa sapatos ang upat ka sachet nga giingong shabu, nga nakita usab sa likod nga bahin sa passenger seat sa sakyanan.
Ang nakumpiskang gidudahang ilegal nga droga gibanabana nga nagkantidad og ₱131,920.
Karon anaa na sa kustodiya sa Calinan Police Station 10 ang suspek ug posibleng mag-atubang og kaso ilalom sa Comprehensive Dangerous Drugs Act of 2002. (Camille Santos Naraga)(Source: Contributed)