Nakapahimulos sa libreng serbisyo medikal ug nagkalain-laing ayuda ang mga residente sa Gutalac atol sa Medikal ug Serbisyo Caravan nga gipahigayon niadtong Marso 3, 2026, isip kabahin sa pagsaulog sa ika-47 nga Araw ng Gutalac.
Gipasiugdahan ang kakihokansa Lokal nga Panggamhanan sa Gutalac ubos sa liderato ni Mayor Eddie Justin T. Quimbo, uban sa suporta sa Provincial Government of Zamboanga del Norte nga gipangulohan ni Darel Dexter Uy.
Sa caravan, gitanyag ang libreng medical consultation, dental services, ug x-ray services nga mitabang sa mga residente nga walay igong kapasidad magpa-check up sa pribadong klinika. Gihatagan usab og medical assistance ug burial assistance ang pipila ka pamilya nga nagkinahanglan og dayon nga suporta.
Gawas sa panglawas nga serbisyo, gipanghatag usab ang mga seedling sa mga mag-uuma ug gitanyag ang veterinary services alang sa mga nag-atiman og kahayupan, nga nagpalig-on sa sektor sa agrikultura sa lungsod.
Pinaagi sa panaghiusa sa munisipyo ug probinsya, nagpadayon ang paghatag og mga programa nga nagpalambo sa kahimsog ug panginabuhi sa mga Gutalacnon, samtang gisaulog ang anibersaryo sa lungsod nga adunay konkreto ug direktang benepisyo sa katawhan.(IKEN B. GULLEM)
Source: LGU GUTALAC-PUBLIC INFORMATION