Nahuman na ang gipahigayong turn-over sa nagkadaiyang donasyon ngadto sa mga benepisyaryo sa lungsod sa Liloy niadtong Marso 3, 2026, nga gipangunahan sa mga partner nga organisasyon gikan sa lokal ug gawas sa nasud.
Ang mga donasyon gipagikan sa Zamboanga del Norte Association of Illinois (ZAMNAI), Children International Philippines, Inc. (CIP), Dipolog Youth Club (DYC), ug Liloy Association of Illinois, nga nagpakita sa padayon nilang suporta sa komunidad sa Liloy.
Mitambong sa maong kalihokan si Mayor Roberto L. Uy Jr., kauban si Municipal Social Welfare and Development Officer Mrs. Rona Mae T. Lismis ug si Engr. Ralph Emmanuel S. Naong. Ilang gidawat ang mga donasyon nga gikatakdang ipanghatag sa mga pamilyang nagkinahanglan ug tabang sa lungsod.
Sumala sa lokal nga panggamhanan, dako ang pasalamat sa lungsod sa mga organisasyon nga nagpaluyo sa maong inisyatibo. Ilabi nang giila ang liderato ni Mr. Joshua Bicoy, Presidente sa ZAMNAI, tungod sa iyang dedikasyon ug paghatud sa mga panalangin ngadto sa katawhan sa Liloy.
Gipahayag sa mga opisyal nga ang maong turn-over dili lamang materyal nga tabang kondili simbolo sa panaghiusa ug pagtinabangay, nga magpadayon sa paghatag og paglaum ug suporta sa mga residente sa Liloy. (IKEN B. GULLEM)
Source: Municipality of Liloy