Pormal nga gibuksan ang upat ka adlaw’ng Child-Friendly Movement:Schools Enhancement Virtual Meeting nga gipasiugdahan sa DepEd-Dipolog karong hapona, Oktubre 26 ning tuiga.
Si Mayor Darel Dexter T. Uy isip pinasidunggang mamumulong, ang mihatag sa iyang mahinungdanong mensahe diin una niyang gi-awhag ang tanang mga misalmot sa maong virtual meeting nga magpabakuna na aron mabatukan ang COVID-19 virus ug makabalik na sa face-to-face classes ang mga magtutungha. Dugang sa mayor, nga duna nay igong suplay sa bakuna ang dakbayan ug wala nay classification o wala nay gipili kon kinsa ang bakunahan gikan sa edad 18 anyos pataas ug aron usab ma-us-osan na ang quarantine classificiation dinhi sa lokalidad.
Alayon sa nasangpit nga webinar, si Mayor Uy ang nagpasalamat sa suporta ug partisipasyon sa matag usa aron magmalumposon kini.
Samtang nagpasalamat usab si City Schools Division Superintendent Dr. Virgilio Batan Jr. ngadto ni Mayor Uy tungod sa kanunay nga pagpaluyo ug pagsuporta niini ngadto sa mga kalihukan sa DepEd dinhi sa siyudad.
Nasayran, nga tumong sa nahisgutan nga kalihukan nga dugang mapalapdan ug makamugna og mga bag-ong pamaagi aron hugtanong ma-implementar ang adbokasiya sa Child-Friendly Movement.
Kining nahisgotang Enhancement Virtual Training ang gisalmotan sa mga School Heads/Administrators, Child-Friendly School Systems Coordinator ug Teacher-Advisers gikan sa nagkalain-laing pribado ug pampublikong tulonghaan dinhi sa Dipolog.
(Source: City Information Office | Dipolog City Government Facebook page)
