Personal nga gisusi ni Mayor Evelyn T. Uy ang kahimtang sa mga importanteng pasilidad sa Dakbayan sa Dapitan atol sa iyang kalit nga pag-inspeksyon niadtong Agosto 19.
Direktang giadto ug gisusi sa Mayor ang mga pasilidad aron makita mismo ang aktuwal nga kahimtang, operasyon, ug mga kinahanglan pang ayuhon o palambuon. Una niyang gisusi ang City Disaster Risk Reduction and Management Office (CDRRMO), lakip ang Emergency Operations Center, monitoring systems, Radio Room, ug mga emergency response vehicle.
Gipakita kaniya ang kasamtangang mga sistema sa pagmonitor sa mga dagkong dalan pinaagi sa CCTV, weather monitoring nga konektado sa PAGASA, ug earthquake monitoring system nga adunay awtomatikong alarma.
Gisusi usab ni Mayor Uy ang mga umaabot nga pagpalambo sa Smart City system sa Dapitan. Apan, iyang gihatagan og dakong pagtagad ang kamahinungdanon sa lig-on nga pisikal nga imprastraktura isip pundasyon sa epektibong paggamit sa teknolohiya.
Human sa CDRRMO, personal usab niyang gisusi ang Dapitan City Cultural and Sports Center aron masuta ang kahimtang sa estruktura, kaluwasan, ug pagmintinar niini.
Ang maong kalit ug personal nga inspeksyon nagpakita sa hands-on nga pagdumala ni Mayor Uy—pag-adto mismo sa mga pasilidad, pagtan-aw sa aktuwal nga kahimtang, ug pag-ila sa mga kinahanglan buhaton aron masiguro nga andam ang siyudad sa pagserbisyo ug pagresponde sa panahon sa emerhensya.(IKEN B. GULLEM)
Source: Dapitan City Government