Giablihan niadtong Agosto 19 ang Coconut Festival and Trade Fair 2026 sa CityMall Dipolog, nga nagtumong sa pagpalig-on sa industriya sa niyog ug paghatag og dugang oportunidad sa lokal nga mga mag-uuma ug negosyo.
Kabahin sa National Coconut Week Celebration 2026, gisugdan ang kalihokan pinaagi sa city-wide motorcade, gisundan sa opening ceremony nga adunay cultural presentation gikan sa Baile Filipina Dance Guild, Inc.
Gipasiugda nila Philippine Coconut Authority (PCA) Zamboanga del Norte Acting Division Chief Elpedio A. Espiritu Jr. ug Department of Trade and Industry (DTI)-ZDN Provincial Director Estrella M. Roda ang dakong potensyal sa industriya sa niyog isip tinubdan sa panginabuhian ug pag-uswag sa lokal nga ekonomiya.
Nagpahayag usab og lig-on nga suporta ang mga opisyal sa siyudad ug probinsya alang sa mga mag-uuma sa niyog. Girepresentahan ni Board Member Dante Bagarinao si Governor Darel Dexter T. Uy alang sa mensahe sa probinsya, samtang mitambong mismo si Dipolog City Mayor Roberto Y. Uy aron ipakita ang suporta sa siyudad sa mga inisyatibo alang sa trade development.
Sa hapon, gipadayon ang selebrasyon pinaagi sa Coco Kusina, usa ka culinary showcase nga nagpakita sa lain-laing paagi sa paggamit sa lokal nga produkto gikan sa niyog.
Ang Coconut Festival and Trade Fair 2026 hiniusang gipahigayon sa DTI Zamboanga del Norte, Coconut Farmers and Industry Development Plan (CFIDP), Coconut Philippines, PCA Zamboanga del Norte ug CityMall Dipolog.
Magpadayon ang kalihokan gikan Agosto 19 hangtod 23, 2026 sa CityMall Dipolog, diin gidasig ang publiko sa pagsuporta sa lokal nga coconut farmers ug home-grown MSMEs.(IKEN B. GULLEM)
Source: DTI Zamboanga del Norte