Gidasig ni Mayor Roberto L. Uy Jr. ang mga tag-iya sa mga beach resort sa Lungsod sa Liloy nga makigkoordinar sa Department of Environment and Natural Resources–Community Environment and Natural Resources Office sa Liloy aron matuman ang mga gikinahanglang environmental requirements.
Gihisgutan ang maong panawagan atol sa miting nga gipahigayon sa DENR–CENRO Liloy aron atubangon ang mga isyu nga naglambigit sa mga beach resort sa lungsod. Giawhag usab sa mayor ang DENR nga hunahunaon ang kahimtang sa mga tag-iya sa resort nga adunay mga istruktura sulod sa regulated areas ug magpatuman og patas ug praktikal nga mga lakang samtang gipadayon ang pagsunod sa mga balaod sa kalikupan.
Gipasiugda usab ni Mayor Uy ang padayon nga suporta sa lokal nga panggamhanan sa industriya sa beach tourism tungod sa dakong natampo niini sa turismo ug panginabuhian sa daghang Liloyanon.
Gilauman nga pinaagi sa panagtinabangay sa DENR, lokal nga panggamhanan ug mga tag-iya sa beach resort, makab-ot ang balanse tali sa pagpanalipod sa kalikupan ug padayon nga kalamboan sa turismo sa Lungsod sa Liloy.(JENIFFER JR. DELICA)
Source: Municipality of Liloy