Gipalig-on sa mga opisyal sa 97th Infantry Battalion ug sa Lokal nga Panggamhanan sa Dipolog ang mga pagpangandam alang sa Inter-Agency Territorial Defense Operations Exercise 2026 in Urban Terrain nga gikatakdang ipahigayon sa Agosto 20 sa dakbayan.
Gihisgutan ang mga andamnon atol sa courtesy visit sa mga opisyal sa 97th Infantry “Kalasaglahi” Battalion nga gipangulohan nila Captain Noel G. Magon, Captain Rolando Ranoco ug Captain Rufino Deculin ngadto kang Mayor Roberto Y. Uy niadtong Hulyo 14.
Sa sayong bahin sa adlaw, gipangulohan usab sa batalyon ang Oversight Committee Meeting sa Gallery 3, Museo Dipolog uban sa mga representante sa nagkalain-laing ahensya ug stakeholders aron hisgutan ang operational plans, logistics ug koordinasyon alang sa maong ehersisyo.
Gilauman nga pinaagi sa lig-on nga panagtinabangay tali sa militar, lokal nga panggamhanan ug mga kaabag nga ahensya, mas mapalig-on ang kahandam sa inter-agency response ug pagmintinar sa kalinaw ug kaluwasan sa Dakbayan sa Dipolog.(JENIFFER JR. DELICA)
Source: Dipolog City Government