Nahimong dinapit si Mayor Darel Dexter T. Uy sa programang Laging Handa Network Briefing nga gipasiugdahan sa Presidential Communications Operations Office (PCOO) via Skype, sa may kapin kon kulang alas 9:00 ang takna sa buntag, Pebrero 14, ning tuiga.
Sa nasangpit nga programa, gikompirmar ni Mayor Uy ngadto ni Bing Kimpo, kinsa maoy host, nga dul-an 90% sa popolasyon sa Dipolog ang fully-vaccinated na samtang 97.93% usab ang naka-1st dose ug kapin sa napulo ka libo na ang naka-Booster dose. Dugang pa niini nga sukad 2021, naka roll-out na og 188 ka libo nga bakuna ang dakbayan ug ning umaabot Pebrero 17 sugdan na usab ang pagbakuna sa nag-edad 5-11 anyos.
Sumala sa mayor, dako ang gikatabang sa vaccination alang sa lokal nga ekonomiya sa Dipolog kay bisan pa man sa krisis nga gi-atubang karon, naningkamot ang dakbayan nga ipadayon, bisan sa limitadong pamaagi, ang ekonomikanhong aspeto.
Matod usab niini, nga ang iyang administrasyon nagtamod sa “inclusive development framework”, ipasabot nga ang tanang sektor gihatagan og pagtagad alang sa padayong paglambo sa siyudad. Gani ang mga nadawat nga mga pasidungog sa dakbayan gikan sa nagkalain-laing ahensiya sa gobyerno maoy nagpamatuod nga ang Dipolog dunay maayong pagdumala.
Niining tanang kalamboan nga nakab-ot sa Dipolog, mapa-ubsanong nagpasalamat si Mayor Uy sa Labaw’ng Makagagahum lakip na usab sa katawhan kay tungod sa panaghiusa ug pagpaningkamot sa tanan, paspas ang kalamboan sa dakbayan.
Kay ang Dipolog naila man nga Gateway to Western Mindanao, gibida sa mayor ang Dipolog City Boulevard nga maoy pinakataas nga boulevard sa tibuok Mindanao, kini dili lamang usa ka lugar alang sa lingaw-lingaw kon dili nakahatag usab kini og panginabuhian sa daghang mga gagmay’ng negosyante. Kini ug uban pang mga atraksiyon sa Dipolog ang gihisgutan sa batan-ong mayor sa maong briefing.
Gipasabot usab ni Mayor Uy nga dungan sa paglambo mao usab ang pagkolekta og buhis apan dinhi sa Dipolog, kini wala nagpasabot nga gidaog-daog ang mga negosyante tungod kay ang buhis nakita man nga gidapat usab dinha sa mga proyekto sa syudad ug ang mga buhis nga gikolekta nagsubay usab sa balaod nga gisitar sa mga hingtungdang ahensiya gani, gihatagan man og diskwento ang mga sayo nga nagbayad og bulohisan.
Ang dakbayan kanunay nga nag-agak sa katawhan pinaagi sa paghatag niini sa mga social services ma-eleksiyon man o dili, ug karong hinayhinay nang mi-os-os ang mga kaso sa COVID-19 ug mayoriya bakunado na, hinay-hinay usab nga gibalik ang na-andang mga programa sama sa pagpahigayon sa Ugnayan at Serbisyo ng Bayan, Barangay Caravan diin ang gobyerno maoy moduol sa kabaranggayan aron itunol ang mga pag-alagad. Kining nasangpit nga kalihukan, sumala pa niya, dili lamang kay karon pa gihimo sa lokal nga kagamhanan kon dili kaniadto pang nakalabay nga mga katuigan apan nahunong lamang tungod sa pandemya. Saysay ni Mayor Uy nga kini personal gayod niyang gihatagan ug pagtagad tungod kay sayod siya nga importante kini alang sa tanan.
Misalmot usab sa nasangpit nga programa mao sila si Mark Bacroya sa RMN-DXDR ug Dipolog City SK Federation President Mandel Zoe Lugasan.
Ang Laging Handa Network Briefing makita nato sa mga istasyon sa PTV ug IBC lakip na usab sa PCOO pages.
(Source: Dipolog City Government Facebook page)