Hugtanong gisuportahan karon ni Mayor Seth Frederick P. Jalosjos ang ilusad nga “ZamPen Motourismo” sa Department of Tourism (DOT) sa Rehiyon IX atol sa gipahigayong konsultasyon kauban ang mga nagkadaiyang grupo sa mga motorcycle enthusiasts sa tibuok probinsya sa Zamboanga del Norte.
Isip usa ka motorcycle rider, halapad na ang kasinatian sa batan-ong mayor mahitungod sa motor tourism dili lang sa mga nagkadaiyang lugar dinhi sa nasud kun dili lakip na gawas sa nasud.
Saysay ni Mayor Jalosjos nga kung malusad na sa DOT kini nga programa, dako kini og tabang aron mas molambo pa ang natad sa turismo sa syudad ug sa tibuok probinsya diin maghatag sab kini og dugang panginabuhian sa katawhan tungod sa dagsang unya sa mga turista nga buot mobisita aron mosuroy sa mga nagkadaiyang tourism sites.
Gisugyot sab ni Mayor Jalosjos sa maong konsultasyon nga maghatag ang DOT og accreditation sa mga establisemento nga ilang masuta nga motorcycle-friendly diin duna kini’y insakto ug luwas nga mga parking area mentras mamahulay ang mga bisita o turista sa usa ka lugar.
Kinahanglan sab nga duna’y mga accredited nga mga mekaniko ug uban pang mga gikinahanglan nga mga pasilidad para sa luwas nga byahe sa mga bisita o turista ug publiko.
(Source: Dapitan City Information Division Facebook page)