Gihatagan og kasayon ang pamilya sa mga mitaliwan ning kalibutan nga mapahiluna ang ilang mga mahal sa kinabuhi pinaagi sa paglusad sa “digital online burial booking” sa City Memorial Park (CMP) o kanhi Bolonsiri Public cemetery adlaw’ng Biyernes, Oktubre 28, 2022.
Ang digital online burial booking usa lamang sa mga serbisyo nga gitanyag karon sa City Memorial Park ubos sa pagdumala sa City Local Environment and Natural Resources Office sa pagpangulo ni Engr Armen Cuenca ug focal person niini nga si Sol Mosqueda.
Lakip sa mga serbisyo sa CMP ang barato ug bag-o usab nga viewing chapels, funeral hearse ug crematorium nga masulayan sa katawhan ilabina sa mga dili makagahom sa mga pribadong funeral home services.
Ang City Memorial Park nga gisugdan ni kanhi Mayor Oscar Moreno gisuportahan usab ni Mayor Rolando “Klarex” Uy diin gikalipay niini nga mahatagan og disente nga haya ug lubong kadtong mga anaa sa kalisdanan.
Kahinumdoman nga mismo ang buhatan ni Mayor Klarex kanunay naghatag og ayuda ilabina sa pamilya sa mga mipanaw na pinaagi sa libreng pagbalsamar, lungon ug uban pa bisan pa man sa wala pa nabuksan ang viewing chapel ug crematorium sa syudad.
Mahimong ma-access ang digital burial booking pinaagi sa pag log-in sa https://services.cagayandeoro.gov.ph/cmpburial/
(ACM, photo courtesy by Roel Felicitas-CIO)
(Source: CIO-Cagayan de Oro)