POLANCO – Dako ang pasalamat ni Polanco Mayor Ying Uy sa mainit nga pagdawat ug pagpaminaw ni Roberto ‘Pinpin’ Uy Jr. sa ilang mga hangyo ug proposal alang sa mga proyekto sa nagkalain-laing lungsod sa distrito. Ang pasalamat gipahayag human sa ilang pagbisita sa House of Representatives of the Philippines.
Giingon sa mayor nga nahimong produktibo ang ilang adlaw uban sa kapwa mga konsehal gikan sa 1st, 2nd ug 3rd Districts, kauban si Board Member Jimboy Chan. Gipunting sa grupo ang mga prayoridad nga proyekto nga makatabang sa pagpalambo sa lokal nga komunidad.
Sumala pa sa mayor, ang panaghiusa sa mga lokal nga lider maoy yawe aron mas mapalig-on ang koordinasyon ug masiguro ang suporta sa nasyonal nga lebel alang sa mga programa sa distrito.
Gidasig ni Mayor Uy ang padayon nga paningkamot alang sa mas maayong pag-uswag sa distrito ug sa lungsod sa Polanco, samtang nagpasalamat sa suporta ug kooperasyon sa tanang lider nga miapil sa maong miting.(JENIFFER JR. DELICA)
Source: Mayor Ying Uy