Aron mas mapalig-on ang serbisyo sa katawhan, personal nga misuroy ug mibisita si City Mayor Evelyn “Belen” T. Uy sa nagkadaiyang importanteng pasilidad sa Dakbayan sa Dapitan.
Lakip sa iyang gibisita ang Temporary Public Market sa Dampa, Dapitan City Dairy Box, Dapitan City Veterinary Clinic, Dapitan Catholic (Common) Cemetery, ug ang Shrine City Livelihood Promotion and Technology Center sa Barangay San Pedro. Kining mga pasilidad importante sa panginabuhian, agrikultura, kahimsog, ug serbisyo publiko sa mga Dapitanon.
Kauban ni Mayor Uy sa site visit sila Engr. Nedilla D. Magdayao, Engr. Allan Amador, ug si Ms. Susan Empeynado, Livelihood Coordinator ug Economic Enterprise Focal Person. Ilang gisusi ang kahimtangan sa mga pasilidad, naminaw sa mga reklamo ug panginahanglan sa katawhan, ug nagtuki sa mga paagi aron mas mapauswag pa ang serbisyo.
Sumala kang Mayor Uy, dako’g tabang ang regular nga pagbisita sa mga pasilidad aron masabtan ang tinuod nga sitwasyon sa lugar. Pinaagi sa direktang pagtan-aw ug pakigpulong sa mga naapektuhan, mas makahimo ang lokal nga pangagamhanan og mga programa nga angay ug epektibo.
Padayon ang Dakbayan sa Dapitan sa paglihok alang sa malinawong ug malungtarong kalamboan, nga ginagiyahan sa responsibilidad, pag-atiman, ug tinuoray nga pagtagad sa kaayohan sa matag Dapitanon.(IKEN B. GULLEM)
Source: City Government of Dapitan