Gipalig-on ni Mayor Evelyn “Belen” Uy ang suporta sa City Government ngadto sa mga organisasyong nagpalambo sa panginabuhian human siyang makigtagbo sa mga miyembro sa Hilltop EGBU SLPA, usa sa mga grassroots groups nga nagpalambo sa panaghiusa ug kalamboan sa komunidad.
Atol sa pagbisita, gidayeg sa mayor ang kakugi, disiplina, ug paningkamot sa mga miyembro sa pagpadayon sa malungtarong panginabuhian, nga matud pa niya usa ka ehemplo sa kalampusan nga matukod pinaagi sa kooperasyon ug hiniusang paningkamot.
Gipasiugda usab ni Mayor Uy nga magpadayon ang lokal nga panggamhanan sa paghatag og suporta pinaagi sa mga programa ug panagtambayayong nga magbukas og dugang oportunidad, makapalig-on sa panginabuhian, ug makapauswag sa kalidad sa kinabuhi sa matag Dapitanon.
Sumala sa mayor, ang kalamboan sa Dapitan magsugod sa pagpalig-on sa matag komunidad, diin ang gobyerno ug katawhan nagtinabangay aron matukod ang mas lig-on, mas inklusibo, ug mas mauswagon nga kaugmaon alang sa tanan.(JENIFFER JR. DELICA)
Source: Mayor Belen Uy