Mas hugot nga implementasyon sa balaod sa trapiko ug kaluwasan sa kadalanan maoy sentro sa public hearing nga gipahigayon sa Sangguniang Panlungsod sa Dipolog kaniadtong Abril 22, alang sa gisugyot nga amendments sa City Traffic Code, nga gitumong aron matubag ang nagkadaghang sakyanan ug isyu sa disiplina sa dalan.
Gihimo ang hearing sa SP Session Hall sa Dipolog Boulevard diin gipresentar ang proposed ordinance nga mag-usab sa pipila ka probisyon sa City Ordinance No. 107. Ang mosyon gisang-at ni City Councilor Harrison “Sho” Young uban sa suporta sa ubang konsehal, nga nagtinguha nga mapalig-on ang kasamtangang polisiya sa trapiko sa siyudad.
Lakip sa mga gipangusab nga probisyon ang pag-regulate sa turning ug driver’s signals lakip ang limitasyon sa U-turns sa pipila ka dalan; pagpatuman og mas hugot nga lagda batok sa modified o unauthorized mufflers nga mahimong kumpiskahon uban sa posibleng pag-impound sa sakyanan; ug pagpalig-on sa truck ban aron malikayan ang grabeng kahuot sa mga mayor nga kalsada.
Atol sa hearing, aktibong mitambong ang nagkadaiyang sektor aron mopadayag sa ilang opinyon ug suhestiyon. Giila sa konseho nga importante ang partisipasyon sa publiko sa paghimo og balaod nga epektibo ug patas. Ang tanang inputs pagatun-an pa aron mapino ang final nga bersyon sa ordinansa nga gilauman nga makahatag og mas organisado, luwas, ug disiplinadong dalan alang sa mga Dipolognon.(IKEN B. GULLEM)
Source: Dipolog City Government