Giduso ang pagsaka sa buwanang honorarium sa mga Barangay Nutrition Scholars (BNS) sa Dapitan human aprubahan sa City Nutrition Committee (CNC) ang resolusyon nga naghangyo og dugang bayad—gikan ₱1,000 ngadto sa ₱1,500—atol sa ilang 1st Quarter Joint Meeting nga gihimo sa Government Center Amphitheater.
Ang maong lakang giisip nga tubag sa dugay nang panawagan nga mas mailhan ug masuportahan ang papel sa mga BNS, nga maoy nagdala sa mga serbisyo sa nutrisyon ngadto sa pinakagamay nga lebel sa komunidad.
Gipangunahan ang tigum ni Mayor Evelyn T. Uy, nga maoy chairperson sa CNC, diin iyang gipasiugda ang komitment sa lokal nga panggamhanan sa pagpalig-on sa nutrisyon nga mga programa ug pag-atiman sa mga frontliners sa komunidad. Gipresentar usab ang mga updates ug prayoridad nga plano sa nutrisyon ni Ma. Leizel C. Balagapo, samtang gipadayag ni Alexandra Meily ang suporta sa konseho alang sa mga polisiya nga may kalabutan sa panglawas ug nutrisyon.
Gitambongan ang maong tigum sa nagkadaiyang ahensya ug opisyal, lakip ang City Health Office, City Social Welfare and Development Office, Philippine National Police (PNP), Department of Education (DepEd), ug uban pang departamento.
Kini nga panagtapok nagpakita sa lig-on nga panaghiusa sa syudad sa pagsulbad sa malnutrisyon ug pagpalambo sa kahimsog sa katawhan, uban ang tumong nga mapalig-on ang serbisyo sugod sa barangay level.(IKEN B. GULLEM)
Source: City Government of Dapitan