Mas organisado ug kasaligan nga datos ang gipunting sa Department of Agrarian Reform (DAR) Zamboanga del Norte aron mapadali ang pagdumala sa mga rekord ug paghatag og serbisyo sa mga mag-uuma ug agrarian reform beneficiaries.
Gipatigom sa DAR Zamboanga del Norte ang mga personnel nga responsable sa Official Data Tracking System (ODTS) alang sa usa ka forum nga nagtutok sa hustong pagdumala sa opisyal nga impormasyon ug mga rekord sa provincial office sa Dipolog City.
Ubos sa pagpangulo ni Provincial Agrarian Reform Program Officer (PARPO) II Daisy Dell Suan Digamon, gisusi sa mga partisipante ang mga pamaagi sa pagrekord, pag-update, pag-file, pagkuha, pagtipig ug pagpanalipod sa mga dokumento ug datos.
Nagsilbi kining sentralisadong sistema diin mahimong makolekta, mamonitor ug ma-update ang opisyal nga impormasyon sa opisina. Pinaagi sa maayong pagdumala niini, mas dali nga makuha ang gikinahanglang datos ug mahimong mas tukma ang mga desisyon ug pagmonitor sa mga programa sa DAR.
Gipatin-aw usab sa forum ang tagsa-tagsa ka responsibilidad sa mga personnel nga nagdumala sa datos, lakip ang hustong pag-retain, pagpanalipod ug pag-dispose sa mga rekord.
Samtang, nanguna sa orientation ug technical discussion si Provincial Chief Administrative Officer (PCAO) Samuel Andrew A. Baliton, CPA, ug Senior Agrarian Reform Program Technologist (SARPT) Eliza L. Porferio.(IKEN B. GULLEM)
Source: DAR Zamboanga del Norte Province