Sa wala pa mobiyahe padulong sa ilang bag-ong assignment, usa ka katapusang panamilit ug pag-ampo alang sa kaluwasan ang gihatag sa mga pulis sa Zamboanga del Norte Police Provincial Office (ZNPPO) nga ipakatap alang sa security operations sa BARMM Parliamentary Election.
Niadtong Septiyembre 6, gipahigayon ang send-off ceremony alang sa mga personnel nga motabang sa pagmintinar sa kalinaw, kahapsay ug seguridad sa panahon sa eleksyon.
Dili sayon ang maong katungdanan tungod kay nagpasabot kini og pagbiya sa ilang mga pamilya ug panimalay aron motuman sa responsibilidad sa laing lugar. Apan alang sa mga pulis, kabahin kini sa ilang panumpa sa pagserbisyo ug pagpanalipod sa katawhan.
Dako ang papel sa mga ipakatap nga personnel sa pagsiguro nga ang mga botante makagamit sa ilang katungod sa pagboto nga walay kahadlok, pagpanghadlok o kapintasan. Kinahanglan usab nilang mapadayon ang pagka-neutral, disiplina ug propesyonalismo sa pagtuman sa ilang election security duties.
Sa wala pa ang ilang pagbiya, gipangulohan ni Rev. Fr. Mario Beltran M. Patangan ang panalangin alang sa mga personnel. Kini nagsilbing pahinumdom sa dakong kabalaka sa ilang mga pamilya—nga bisan layo sila sa ilang mga minahal, hinaot nga luwas silang makabalik sa ilang panimalay.
Gipahinumdoman usab sila ni Provincial Director PCOL Reydante E. Ariza nga tumanon ang ilang katungdanan uban ang kaisog, disiplina, propesyonalismo, pagkamatarong ug kanunay nga pagbantay.
Gipasiugda ni PCOL Ariza ang importansya sa pagtinabangay sa mga personnel atol sa ilang deployment, ilabi na kay ang matag ilang lihok mahimong makaapekto dili lamang sa kaluwasan sa komunidad kondili usab sa pagsalig sa katawhan sa proseso sa eleksyon.
Sa maong assignment, dili lang seguridad ang ilang gidala. Kauban niini ang pagsalig sa publiko ug ang paglaom sa ilang mga pamilya nga makabalik sila nga luwas.(IKEN B. GULLEM)
Source: Zamboanga del Norte Provincial News Network