Gipasiugda sa Jose Rizal Memorial State University (JRMSU) ug City Government of Dapitan ang kahinungdanon sa Marine Biology sa pagpalambo sa sektor sa agrikultura ug pangisdaan pinaagi sa Culmination Activity sa mga estudyante sa Bachelor of Science in Marine Biology niadtong Hulyo 29.
Gipahigayon ang kalihokan sa pakigtambayayong sa City Agriculture Office, diin gipasiugda sa mga mamumulong ang papel sa Marine Biology sa pagpreserbar sa yamang-dagat, pagpalig-on sa malungtarong pangisda, ug pagsuporta sa pag-uswag sa lokal nga agri-fishery sector.
Gitambongan ang programa nila City Mayor Evelyn T. Uy ug Sangguniang Panlungsod Committee on Agriculture Chairperson Dennis A. Tan, nga nag-awhag sa kabatan-onan sa pagkuha og mga kurso nga may kalabotan sa agrikultura ug pangisdaan aron mahimong sunod nga henerasyon sa mga researcher, practitioners, ug lider sa maong sektor.
Sumala sa City Government of Dapitan, ang maong inisyatibo nagpakita sa lig-on nga panag-uban sa lokal nga panggamhanan ug JRMSU sa pag-andam sa mga propesyonal nga makatampo sa pagpanalipod sa kinaiyahan, pagpalig-on sa food security, ug malungtarong kalamboan sa Dapitan City.(IKEN B. GULLEM)
Source: Dapitan City Agriculture Office