Adunay pagkakunhod sa kaso sa malnutrisyon ning lalawigan sa Zamboanga del Norte, base sa datus sa Zamboanga del Norte Operation Timbang (OPT) 2022-2023.
Kini pinasikad sa gipakita nga datus ni Provincial Nutrition Action Officer Dr. Jose “Pepe” Mante atul sa gipahigayong Provincial Nutrition Summit and Provincial Nutrition Culmination Program sa Zamboanga del Norte Convention and Sports Center ning dakbayan sa Dipolog.
Niini, hugtanong naghangyo si Dr. Mante ngadto sa mga kalungsuran ning lalawigan nga ipadayon ang mga programa pagpakigbatok sa malnutrisyon pinaagi sa pagsuporta ug pakigtambayayong sa probinsya.
Ang underweight sa tuig 2021 anaa sa 5.36, sa 2022 anaa sa 4.50 ug karong tuiga 3.5.
Niini, nakita nga adunay gamay nga pagkunhod sa malnutrisyon sukad paglingkod ni Governor Rosalina “Nanay Nene” Jalosjos isip inahan ning lalawigan kompara sa nakalabay nga administrasyon gumikan sa mga interbensyon nga gihimo sa probinsya.
Dugang ni Dr. Pepe nga bisan nagmauswagon na ang probinsya sa Zamboanga del Norte, apan anaa gihapon ang malnutrisyon nga problema nga wala pa masulbad tungod kay nagkinahanglan pa ang probinsya sa hugtanong suporta gikan sa mga lokal nga pangagamhanan.
Nasayran nga tumong sa pagpahigayon sa 2nd Provincial Nutrition Summit ug Provincial Nutrition Culmination Program aron sa pagplano, pagtuki ug mahatagan sa kasulbaran ang problema sa malnutrisyon ning lalawigan.
(Source: Provincial Information Center ZaNorte Facebook page)