Nakadawat og mini tilling machines ug nagkalain-laing farm inputs ang mga mag-uuma sa Barangay Owaon atol sa turnover program nga gipahigayon sa City Agriculture Office niadtong milabay nga adlaw.
Sumala ni City Agriculturist Cyril Patangan, bisan limitado ang gidaghanon sa makinarya, dako gihapon kini’g ikatabang sa pagpausbaw sa produksyon sa uma. Giawhag usab niya ang barangay ug mga organisasyon sa pagtinabangay aron masiguro ang patas nga paggamit sa mga ekipo.
Lakip sa gipanghatag ang mini tilling machine, mga seedlings, ug lima ka sako sa 14-14-14 nga abono. Sa maong kalihokan, nakadawat usab og ₱20,774 nga insurance claim si Eddie Mendez Bendano sa Barangay Aliguay gikan sa Philippine Crop Insurance Corporation human madaot ang iyang pananom tungod sa bagyo sa miaging tuig.
Gipasalamatan usab ni City Councilor Dennis Tan ang padayon nga suporta ni Mayor Evelyn “Belen” Uy sa sektor sa agrikultura. Gipasiugda niya ang kahinungdanon sa backyard gardening ug ang husto nga pag-atiman sa mga nadawat nga kahimanan.
Sumala sa lokal nga kagamhanan, kabahin kini sa ilang padayon nga programa aron mapalambo ang produksyon sa pagkaon ug mapalig-on ang panginabuhian sa mga mag-uuma ug mangingisda.(IKEN B. GULLEM)
Source: City Government of Dapitan