Gibansay ang mga lokal nga mag-uuma sa paghimo og nagkalain-laing organic concoctions ug sa hustong pag-atiman sa Lakatan banana plantation atol sa seminar ug hands-on training nga gipahigayon niadtong Marso 10, 2026.
Gipangunahan ang pagbansay sa R-PSB Team sa Zamboanga del Norte 2nd Provincial Mobile Force Company (PMFC) ubos sa pagdumala ni PLTCOL Edwin D. Verzon ug sa liderato ni Patrolman Ahmad-Khan Macam.
Atol sa maong kalihokan, gitudluan ang mga partisipante sa praktikal nga pamaagi sa pag-andam ug paggamit sa organic concoctions aron mapalambo ang fertility sa yuta, mapalig-on ang kahimsog sa mga tanom, ug madugangan ang ani sa mga pananom. Gisuportahan usab ang pagbansay ni TESDA Agricultural Technician Jun Alfonso T. Benlot ug ni Barangay Chairman Glenn Pascual.
Miatubang usab sa maong seminar ang mga miyembro sa Mamamawan Alsa Masa Farmers Association nga aktibong mitambong sa pagbansay aron mapalambo pa ang ilang kahibalo sa environment-friendly ug sustinableng pagpanguma.(IKEN B. GULLEM)
Source: Zamboanga del Norte 2nd PMFC