Gipasidunggan ang nagkalain-laing barangay sa Zamboanga del Norte tungod sa ilang lig-on nga papel sa pagmintinar sa kalinaw pinaagi sa epektibong pagpatuman sa Katarungang Pambarangay, atol sa 2025 Lupong Tagapamayapa Incentives Awards (LTIA) nga gipahigayon sa Dipolog City.
Lakip sa mga nanguna nga barangay ang Olingan sa Dipolog City ug Motibot sa Sindangan isip regional winners, samtang misunod ang Nabilid sa President Manuel A. Roxas isip first runner-up. Giila usab ang Talinga sa Leon B. Postigo ug Sto. Niño sa Polanco isip second runners-up.
Gipangunahan ang kalihokan sa Department of the Interior and Local Government (DILG) Regional Office IX uban sa provincial ug barangay liga, diin gipasiugda nga ang epektibong pagresolba sa panaglalis sa barangay makatabang sa paglikay sa mas dako nga problema sa komunidad.
Matud sa mga opisyal, ang kalampusan sa mga awardees nagpakita nga kung lig-on ang sistema sa hustisya sa barangay, mas dali mapreserbar ang kalinaw ug panaghiusa sa katawhan.
Gihatagan og cash incentives nga nagkantidad og ₱120,000 ug ₱100,000 ang mga mananaog isip pag-ila sa ilang maayong performance ug aron dasigon pa ang ubang barangay nga mosunod sa ilang ehemplo.
Gilauman nga ang maong inisyatiba magpadayon sa pagpalig-on sa grassroots justice system ug makatampo sa malungtarong kalinaw ug kalamboan sa probinsya.(IKEN B. GULLEM)
Source: DILG REGION 9