Naghiusa ang mga bise mayor gikan sa nagkalain-laing bahin sa nasud atol sa Vice Mayors’ League of the Philippines (VMLP) 2nd Quarter 2026 National Executive Board Meeting ug 2nd National Conference of the Academy of Presiding Officers nga gipahigayon kaniadtong Abril 23 hangtod 25 sa Diamond Hotel Manila.
Apil sa mitambong ang representante sa Dapitan City, nga mapahitas-on nga nagdala sa ngalan sa “Shrine City of the Philippines,” aron makigbahin sa diskusyon nga nagtumong sa pagpalig-on sa legislative leadership, maayong pangagamhanan, ug mas epektibong kolaborasyon tali sa mga lokal nga panggamhanan.
Sa maong tigum, gipasiugda ang pagbinayloay og best practices tali sa mga opisyal, ilabi na sa pagdumala sa mga konseho ug pagpatuman sa mga polisiya nga makabenepisyo sa komunidad.
Usa sa mga nahimong sentro sa kalihokan mao ang panaghiusa sa mga bise mayor sa Zamboanga Peninsula, lakip ang pakigkita kang Vice Mayor Senen Angeles sa Dipolog City, nga nagpalig-on sa panag-uban ug panagtambayayong sa rehiyon.
Kini nga conference naghatag og higayon aron mapalapdan ang kahibalo sa pamunoan ug mapalig-on ang koordinasyon sa mga lokal nga lider alang sa mas maayong serbisyo publiko.(IKEN B. GULLEM)
Source: VM CAD