Gisugdan kaniadtong Marso 4, 2026 sa Lokal nga Panggamhanan sa Dapitan ang katapusan nga pagpangandam alang sa selebrasyon sa Easter pinaagi sa pagpahigayon og coastal clean-up ug pagpaayo sa mga pasilidad sa Sunset Boulevard.
Gipangunahan kini sa City Economic Enterprise Office ubos sa liderato ni Ms. Susan Empeynado, uban sa tabang sa mga kawani nga gipangulohan ni Mr. Noel Benedicto. Nagkahiusang nanglimpyo ang team sa daplin sa baybayon aron tangtangon ang basura ug uban pang sagabal nga makadaot sa kahimtang sa lugar.
Tumong sa maong lakang ang paghatag og limpyo ug luwas nga palibot alang sa mga residente ug mga bisita nga gilauman motambong sa kasaulogan sa Easter Sunday.
Apil sa ilang gihimo ang inspeksyon sa mga cottage sa boulevard aron maseguro nga andam kini gamiton sa publiko. Dugang pa, gipahimutang ang mas kusog nga suga aron masiguro ang kahayag ug kaluwasan sa lugar ilabi na sa kagabhion.
Gipahinumduman usab sa LGU ang publiko nga magtinabangay sa pagmintinar sa kalimpyo pinaagi sa pagpraktis sa “Clean As You Go” samtang naglingaw-lingaw sa baybayon.
Naglaum ang lokal nga panggamhanan nga pinaagi sa panaghiusa sa komunidad, mapabiling hapsay, limpyo, ug madanihon ang Dapitan alang sa tanan ning panahon sa Semana Santa.(IKEN B. GULLEM)
Source: City Government of Dapitan