Usa na sab ka maayong gawi sa pagkamatinud-anon ug maayong panagtinabangay sa komunidad ug kapulisan ang nahitabo sa Barangay Datu Tangkilan, Sindangan diin malampusong nauli ang usa ka nawala nga handheld radio ngadto sa tinuod nga tag-iya niini.
Sumala sa report, ang 1st Zamboanga del Norte Provincial Mobile Force Company (1st ZNPMFC) ubos sa pagpanguna ni PLTCOL Ryan Jay R. Capurcos, pinaagi sa 4th Forward Operating Base (FOB) Platoon, nakadawat sa maong butang gikan sa usa ka matinud-anong sibilyan.
Ang handheld radio gi-turnover ni Arnold M. Torres ngadto sa mga kapulisan human niya kini makita. Wala maglangan, ang 4th FOB Platoon mihimo dayon og lakang aron masiguro nga mauli kini sa hustong tag-iya. Sa ilang koordinasyon, malampusong naibalik ang maong kagamitan kang G. Jeffrey F. Tagapulot, nga maoy lehitimong tag-iya niini.
Kini nagpakita sa lig-on nga panag-uban tali sa komunidad ug law enforcement sa pagpalambo sa pagsalig, responsibilidad, ug matinud-anong pagserbisyo sa publiko. Padayon usab ang ilang panawagan sa katawhan nga magpabiling matinud-anon ug makighiusa sa kapulisan alang sa kalinaw ug kaayohan sa tanang residente.(IKEN B. GULLEM)
Source: Zamboanga del Norte 1st Provincial Mobile Force Company