KATIPUNAN, ZDN (Agusto 9, 2026) – Makapahimulos na sa mas luwas ug mas sayon nga pagbiyahe ang mga residente sa lima ka barangay sa Katipunan human pormal nga giturn-over niadtong Biyernes, Agosto 7, ang bag-ong ₱3.5-milyon nga steel bridge sa Barangay Seres.
Gipangunahan ni Governor Darel Dexter T. Uy, Katipunan Mayor Jose Michael “Maiko” A. Wong, ug 2nd District Representative Irene “Ate Ai” G. Labadlabad ang turnover ceremony nga gihimo alas 2:00 sa hapon, uban sa mga lokal nga opisyal ug mga residente. Ang one-lane, 2-column steel deck bridge nga adunay railings gipondohan sa Local Government Unit sa Katipunan.
Gilauman nga mas mapaayo sa bag-ong tulay ang koneksiyon ug pagbiyahe sa maong mga barangay, ilabina panahon sa kusog nga ulan ug pagbaha diin kanunayng malapawan sa tubig ang daang spillway. Pinaagi niini, mas luwas ug mas paspas ang paglihok sa mga residente, serbisyo ug panginabuhian sa maong lugar.
Sa pagtapos sa seremonya, pormal nga gitunol sa Local Government Unit sa Katipunan ngadto sa mga opisyal sa Barangay Seres ang “key of responsibility” isip timaan sa pag-atiman ug pagpanalipod sa proyekto. Ang bag-ong tulay gitumong nga makahatag og dugayng kaayohan sa mga residente sa Barangay Seres ug mga kasikbit nga komunidad.(JENIFFER JR. DELICA)
Source: Zamboanga del Norte Provincial News Network