Lima ka alimasag nga adunay itlog o “berried crabs” gibuhian balik sa ilang natural nga puy-anan sa Suba sa Dapitan isip kabahin sa padayong kampanya sa dakbayan alang sa pagpanalipod sa kinaiyahan ug yamang tubig.
Gipangulohan ni City Councilor Dennis Tan, chairman sa Committee on Agriculture, ug City Agriculturist Cyril Patangan ang maong aktibidad niadtong Mayo 6, uban sa tabang sa mga personnel sa City Agriculture Office aron masiguro ang hustong pagdumala sa mga alimaság atol sa pagbuhi niini.
Sumala sa City Government of Dapitan, importante ang maong lakang aron makapangitlog og natural ang mga alimaság ug makatabang sa pagpadaghan sa ilang populasyon sa umaabot nga mga tuig.
Kabahin usab kini sa mas lapad nga programa sa siyudad alang sa biodiversity preservation ug environmental sustainability, ilabi na sa pagpanalipod sa marine ug freshwater resources.
Gilauman nga pinaagi niini, mapadayon ang himsog nga ekosistema sa suba nga maoy kabuhian sa daghang lokal nga mangingisda.(IKEN B. GULLEM)
Source: City Government of Dapitan