Gihisgutan sa City Agriculture Office ug City Program Management and Implementing Unit (CPMIU) ang rehabilitasyon ug concreting sa farm-to-market road nga magdugtong sa mga barangay sa Aseniero, Masidlakon, ug Opao sa Dakbayan sa Dapitan.
Gipangunahan ni Engr. Kevin Dorot ang panaghisgot sa New Government Center, diin gi-review ang technical requirements, project documents, ug mga update sa implementasyon sa proyekto.
Tumong sa maong diskusyon ang pagsiguro nga ang proyekto mosunod sa standards sa Philippine Rural Development Project (PRDP) aron malikayan ang posibleng problema ug delay sa konstruksyon.
Giklaro usab sa CPMIU nga igo gihapon ang counterpart funding sa Local Government Unit (LGU) bisan pa sa pagsaka sa presyo sa mga materyales tungod sa inflation.
Kini nga proyekto pondohan pinaagi sa hiniusang suporta sa World Bank, National Government, ug LGU.
Sa dihang mahuman, gilauman nga mas mopaspas ang pagdala sa mga produkto ngadto sa merkado ug mas molambo ang transportasyon sa mga komunidad nga maagian sa maong dalan.(IKEN B. GULLEM)
Source: City Government of Dapitan