Gipalig-on sa Liloy District Jail ang rehabilitasyon sa mga Persons Deprived of Liberty pinaagi sa HAPAG Program nga nakapunting sa urban gardening, ilalom sa pagdumala sa Welfare and Development Unit ubos sa pangulohan ni JCINSP Arvin Dan R. Aguito. Tumong sa programa ang paghatag og praktikal nga kahibalo ug disiplina nga makatabang sa personal nga kauswagan ug responsableng pamatasan sa mga PDL samtang anaa sila sa kustodiya.
Pinaagi sa aktuwal nga pagbansay sa pagpananom og gulay, paghimo og compost, pag-atiman sa yuta, ug batakang agribusiness, nahatagan ang mga PDL og kahanas nga magamit sa pagsiguro sa pagkaon ug posibleng panginabuhian inig balik nila sa komunidad. Labaw pa sa teknikal nga kahibalo, gitudloan usab sila sa teamwork, disiplina, ug pagbaton og tumong sa kinabuhi, nga maoy pundasyon sa tinuod nga kausaban.
Usa sa gipili nga livelihood sa pasilidad mao ang pagpananom og ampalaya, nga nagsilbing produktibo ug edukasyonal nga kalihokan. Gawas sa pagdugang sa suplay sa gulay sa prisohan, kini usab naghatag og therapeutic nga benepisyo pinaagi sa hands-on nga trabaho. Pinaagi sa HAPAG Program, nagpadayon ang Liloy District Jail sa pagtukod og dalan padulong sa holistic rehabilitation, andam nga dal-on sa mga PDL ang bag-ong kahanas ug paglaum sa ilang pagbalik sa katilingban.(JENIFFER JR. DELICA)
Source: Liloy District Jail- BJMPR9