Gipatuman sa Dapitan City Fire Station ang Fire Square Roadshow sa PAGASA Philippine Finance Corporation sa Banonong, Dapitan City, ilalom sa pangulohan ni Fire Superintendent Rommel M. Rojas, REE, Acting City Fire Marshal. Tumong sa kalihokan ang pagpalig-on sa kahibalo ug kaaandam sa mga empleyado batok sunog ug uban pang emerhensiya sa trabahoan.
Gilangkuban ang roadshow og fire safety lecture, husto nga paggamit sa fire extinguisher, ug EDITH o fire drill, aron mas masabtan sa mga personnel unsaon paglihok sa hustong paagi kon adunay sunog o kalit nga insidente. Gitutokan usab ang paspas ug organisadong pagtubag aron malikayan ang mas dakong kadaut.
Pinaagi niini, gipakita sa Bureau of Fire Protection ang padayon nga paningkamot sa pagpalapad sa fire safety awareness ug disaster preparedness sa komunidad. Nagpasalamat ang Dapitan City Fire Station sa pamunuan ug empleyado sa PAGASA Philippine Finance Corporation sa ilang aktibong partisipasyon ug kooperasyon sa kalampusan sa maong kalihokan.(JENIFFER JR. DELICA)
Source: BFP R9 Dapitan City Fire Station