Gipaspasan ang pagpalapad sa mga benepisyo alang sa senior citizens sa probinsya human mikortesiya si National Commission of Senior Citizens (NCSC) Commissioner Camilo G. Gudmalin kang Governor Darel Dexter T. Uy, kaniadtong Abril 28.
Sa ilang panagtagbo, gisentro ang diskusyon sa padayon nga pagduso sa social pension program sa NCSC, nga nagtumong hatagan og regular nga binulan nga ayuda pinansyal ang mga tigulang nga walay igo nga panginabuhian.
Gihisgutan usab ang plano sa NCSC nga magtukod og regional office sa Region 9, nga posibleng ipahimutang sa Dipolog City. Sumala sa Kapitolyo, mitanyag si Gov. Uy og suporta sa pagpangita og angay nga luna aron mapadali ang pag-establisar sa maong opisina.
Ang pagtukod og lokal nga opisina gilauman nga makapadali sa paghatag serbisyo ug koordinasyon sa mga programa para sa senior citizens sa probinsya ug kasikbit nga mga lugar.
Si Gudmalin nanumpa isip NCSC commissioner niadtong Abril 13, 2026, ug kaniadto nagsilbi isip DSWD undersecretary ug consultant sa World Bank ug Asian Development Bank.
Ang NCSC usa ka ahensya sa gobyerno nga gimugna ilawom sa Republic Act No. 11350 aron magdumala ug magpatuman sa mga polisiya ug programa alang sa senior citizens, uban ang tumong nga mapalig-on ang ilang kaayohan ug proteksyon sa nasud.(IKEN B. GULLEM)
Source: Zamboanga del Norte Provincial News Network