Nakatabang sa kapin 100 ka pasyente ang libreng “Kuyog Ta” Medical Check-up nga gipahigayon sa Probinsyal nga Pangagamhanan ubos sa liderato ni Governor Darel Dexter T. Uy sa Zamboanga del Norte Medical Center sa Dipolog City.
Gihatagan ang mga pasyente og libre nga konsultasyon ug espesyal nga pag-atiman alang sa sakit sa kasingkasing, baga, ug dugo, lakip ang mga nagpa-dialysis ug kababayen-an nga nanginahanglan og OB-GYNE services, diin usa usab ka pasyente ang malampusong naoperahan.
Gipahigayon ang kalihokan sa pakigtambayayong sa One Stop Assistance Center ug mga espesyalistang doktor gikan sa Cebu City, samtang ang ZNMC ubos sa pagdumala ni Dr. Esmeralda A. Nadela nagpadayon sa paghatag og dekalidad nga serbisyo sa katawhan.
Gipakita sa programa ang padayon nga paningkamot sa probinsya sa pagpalapad sa serbisyong panglawas, aron masiguro nga duol, paspas ug libre nga medikal nga tabang ang matag residente nga nanginahanglan niini.(JENIFFER JR. DELICA)
Source: Zamboanga del Norte Provincial News Network