Nanawagan ang City Government of Dapitan og mas lig-on nga aksyon aron mapanalipdan ang katungod ug kaayohan sa mga batang babaye duyog sa pagsaulog sa 30th Girl Child Week gikan Marso 22 hangtod 28, 2026.
Kini nga panawagan, gipasiugdahan sa City Social Welfare and Development Office atol sa flag-raising ceremony niadtong Lunes, diin gi-engganyo ang mga empleyado sa gobyerno ug komunidad nga mahimong aktibo sa paghimo og luwas ug inklusibong palibot alang sa tanang batang babaye nga edad 18 paubos.
Gidala sa selebrasyon ang tema nga “Katawan Ko, Karapatan Ko: Edukasyon Tungo sa Malaya at Ligtas na Pagpapasya,” nga nagpasabot sa kahinungdanon sa edukasyon aron mapalig-on ang kahibalo ug pagsalig sa kaugalingon sa mga batang babaye sa paghimo og hustong desisyon.
Kabahin usab kini sa mas lapad nga tumong sa siyudad sa pagpalambo sa kahibalo, pagpalig-on sa proteksyon, ug pagmintinar sa kalinaw alang sa kabataan.
Samtang, gilauman nga pinaagi sa maong kalihokan, mas mapalig-on ang panaghiusa sa komunidad aron masiguro nga ang matag batang babaye sa Dapitan madungog, mahatagan og bili, ug mapanalipdan alang sa mas hayag nga kaugmaon.(IKEN B. GULLEM)
Source: City Government of Dapitan