Laing hugna na usab sa mga bagong pisa nga olive ridley turtle hatchlings ang gipagawas sa City Government of Dapitan sayo sa buntag niadtong Marso 23 sa daplin sa Sunset Boulevard.
Gipasiugdahan ang maong kalihokan, ubos sa liderato ni Mayor Evelyn “Belen” T. Uy, samtang si OIC-City Legal Officer Atty. Bryne Angelo Brillantes maoy nanguna sa implementasyon sa programa. Nakigtambayayong usab ang City Environment and Natural Resources Office (CENRO) nga gidumala ni Dr. George Olario Jr., ug ang City Information Division pinaagi ni Kathlyn U. Hamoy.
Kini nga aktibidad kabahin sa ilang padayon nga kampanya sa pagpanalipod sa kinabuhi sa kadagatan ug sa pagpreserbar sa kahimtang sa baybayon. Gitinguha usab niini nga mapadasig ang aktibong partisipasyon sa komunidad sa mga programa alang sa kalikupan.
Dugang pa, gikatakdang magpahigayon og seminar mahitungod sa konserbasyon sa pawikan karong Marso 30 aron mapalawom ang pagsabot sa publiko bahin sa kahinungdanon sa pag-amuma sa marine biodiversity.
Ang sunod-sunod nga kalihokan nagpamatuod sa lig-on nga paningkamot sa Dapitan City Government sa pagpanalipod sa kinaiyahan ug sa pagseguro nga mapadayon kini alang sa umaabot nga mga henerasyon.(IKEN B. GULLEM)
Source: City Government of Dapitan