Imbis nga manok, rehas ang gihimas-himas karon sa 3 ka sugarol homan kini masikop sa mga operatiba sa Dipolog City Police Station atol sa gipatuman nga operasyon batok sa ilegal nga sugal nga “Tari-tari”,didto sa Brgy. Diwan, Dipolog City mga alas 5:15 ang takna sa hapon niadtong sa Marso 22, 2026.
Ang mga dinakpan nga mga indibidwal naila usa ka 50 anyos, lalaki, minyo, drayber, ug residente sa Pamansalan, Brgy. Diwan, Dipolog City, usa ka 34 anyos, lalaki, ulitawo, negosyante, ug residente sa Brgy. Sta. Filomena, Dipolog City ug usa ka 46 anyos, lalaki, minyo, negosyante og mga pagkaon, ug residente sa Purok 2, Brgy. Diwan, Dipolog City, kinsa puros nadakpan sa akto, nga nalambigit sa ilegal nga sugal nga “Tari-tari”.
Atol sa operasyon nakumpiska gikan sa mga dinakpan ang usa ka piraso sa manok nga pang-away, kolor pula ug itom nga kombinasyon nga adunay bulang, usa ka piraso sa sunoy nga pang-ilog, kolor abohon ug itom nga kombinasyon nga may may bulang pa ug patay na, P600 nga kwarta nga nagsilbing pusta.
Ang mga nadakpang suspek gipahibalo sa hinungdan sa ilang pag-aresto ug mga katungod subay sa konstitusyon sa diyaleko nga hingpit nilang nasabtan ug temporaryong gibalhog karon sa Dipolog CPS detention cell alang sa pag andam pagpasaka og kaso .
Samtang ang mga nakumpiska nga gamit sa sugal gidala na sa opisina alang sa eksibit sa korte.(MEDALYN U. BORJA)
Source: DIPOLOG CPS