Gipakita sa Lokal nga Gobyerno sa Gutalac ang padayong pagtagad ug pag-ila sa mga senior citizens human malampusong mapahigayon ang Cash Gift Distribution alang sa 54 ka octogenarian ug nonagenarian sa munisipyo.
Ang kalihokan gipangunahan sa administrasyon ni Municipal Mayor Eddie Justin Quimbo isip pamaagi sa pagpasidungog sa mga katigulangan nga dugay nang nag-amuma ug nag-alagad sa komunidad. Sumala sa LGU, ang maong programa dili lamang pinansyal nga tabang kundili simbolo usab sa pasalamat ug pag-ila sa dakong papel sa mga senior citizens sa pag-uswag sa Gutalac.
Midugang og dungog ug bili sa kalihokan ang presensya ni National Commission on Senior Citizens (NCSC) Regional Director Fernando Sumondong, CESE. Iyang gipasiugda ang importansya sa panaghiusa tali sa lokal ug nasyonal nga gobyerno aron masiguro ang hustong pag-atiman sa mga katigulangan, ilabina sa ilang sosyal ug panginabuhian nga panginahanglan.
Gipadayag usab sa lokal nga pangulohan nga magpadayon ang LGU Gutalac sa pagpalig-on sa mga programa nga nagpunting sa kaayohan sa senior citizens, subay sa tumong sa serbisyo nga may gugma, hustisya, ug kalidad.(IKEN B. GULLEM)
SOURCE: LGU GUTALAC-PUBLIC INFORMATION