Duol nga serbisyo sa Land Transportation Office (LTO) ang matagamtaman sa mga residente sa Polanco ug silingang mga barangay pinaagi sa Licensing Caravan nga ipahigayon karong Hunyo 6, 2026 sa Polanco Gymnasium sa Poblacion North.
Kini nga kalihokan resulta sa panagtinabangay sa LTO ug Local Government Unit sa Polanco aron mas mapadali ug mapahapsay ang pag-avail sa serbisyo sa ahensya nga magsugod alas 8:00 sa buntag hangtod alas 5:00 sa hapon.
Gikinahanglan nga magdala ang mga aplikante og bisan unsang valid government-issued ID sama sa National ID, UMID, ug Postal ID. Mahimo usab nga PSA o NSO Birth Certificate ang gamiton sa mga walay valid ID.
Gilauman sa mga otoridad nga daghang residente ang mopahimulos sa caravan aron dili na kinahanglan mobiyahe pa sa layo alang lamang sa ilang transaksyon sa LTO.(IKEN B. GULLEM)
Source: PNP Polanco Municipal Police Station