Gipahigayon sa Zamboanga del Norte Police Provincial Office (ZNPPO) ang libreng computerized eye check-up ug vision screening pinaagi sa ZNPPO Vision Initiative: PROSIGHT alang sa mga sakop sa kapolisan, ilang mga pamilya, ug pipila ka mga residente, kaniadtong Hulyo 2 sa Camp Lt. Deogracias G. Hamac sa Barangay Sicayab.
Gipangulohan ni Provincial Director PCol. Reydante E Ariza ang maong kalihokan isip kabahin sa pagsaulog sa ika-31 nga Police Community Relations (PCR) Month.
Mirepresentar kang PCol. Ariza si PMaj Rolando C. Matinong, OIC sa PARMU, kinsa mipasalamat sa PROSIGHT Eye Care Center sa ilang pakigtambayayong sa paghatag og libreng serbisyo sa kapolisan sa probinsya.
Matod ni Dr. Kimberly Diane Supetran, Team Leader sa PROSIGHT Eye Care Center, importante nga mapreserbar ang maayong panan-aw sa mga personnel tungod kay kabahin kini sa epektibo nilang pagtuman sa ilang katungdanan sa pagmintinar sa kalinaw ug kahapsay.
Ang PROSIGHT Eye Care Center, usa ka pribadong eye clinic nga nakabase sa Calamba, Laguna, nakigtambayayong sa Police Regional Office 9 aron mapalapad ang ilang serbisyo ngadto sa mga police unit sa rehiyon. Gilauman nga mokabat sa 50 ka mga benepisyaryo ang mapahimuslan sa maong programa.(IKEN B. GULLEM)
Source: Zamboanga del Norte Provincial News Network